好想講下香港仔同鴨脷洲呢個地方

鴨脷洲，呢個地方我一出世就住响度，記得那時沒有鴨脷洲大橋更沒巴士，沒有鴨脷洲西邨，只有木屋同住家艇，人大了，結婚有小孩了，一早已搬到新界住，最近在老媽家看到一些以前的照片，從老掉了的記憶找回這個地方既從前。。。

從網上找到一些從前香港仔既圖片，前無咁繁榮，但唔知點解感覺好靚。

呢張係咩年份?? 利東邨都未起，海怡仲係發電廠。

當年香港仔海皮，仲未填海，仲有中巴，遠望見到鴨脷洲大橋，自從有鴨脷洲大橋後，我經常由鴨脷洲行到圖中既香港仔海皮。

呢張仲見到 "安置區"，安置區呢個名我以前係咁叫，唔知有冇叫錯，安置區側邊有好多木屋，有 D 係起水上面既。

香島戲院，唔知仲有幾多人記得呢間野，以前去睇戲要由鴨脷洲坐電船仔去香港仔。

當年火燒連環船，火燒木屋區，記得因為大火得滯，鴨脷洲大橋封左，要行鴨脷洲大橋番屋企，一邊行一邊睇住 D 屋燒緊，當時覺得好可怕。

當年既鴨脷洲，好多住家艇，仲記得細個住木屋有老鼠，用老鼠籠捉到後，就係去呢 D 住家艇側邊既海邊浸死隻老鼠。

今時今日，幾十年間，香港仔已經變成好似下圖咁既樣，一個現代化既社區。