你的另一半回來了，你會落街接他嗎?

我和我太太由相識、拍拖、結婚到有小孩，一起住在一起也有十年，每次我太太回家打電話比我，都會放下手邊事情，落街接他或他們(多了小孩後)回家，不知不覺已成為習慣，不覺得是什麼事，都這麼多年了。

為什麼會想起這種事?? 因為最近和朋友講電話時，一段幾有趣既內容。

朋友: 做緊咩?
我: 落街接太太回家。
朋友: 今日係咩特別日子? 要落去接佢?
我: 無，每次我太太打電話比我話就落車，我都會去接佢。
朋友: 咁唔阻住你啦，Bye..

這段對話，令我想起原來多年前我太太同我講，呀邊個邊個話當兩公婆老夫老妻之後，就唔會再落街接另一半啦，我話唔會。。。。。

就係因為呢個 "唔會" ，係我心入面對自己既一個承諾，除了兩三次我病得起唔到身外，都會做 "落街接另一半" 呢個動作，由屋企行到太太落車既地方，大約要行十分鐘，來回約二十分鐘，如果接埋小孩，行下停下，就要約三十分鐘。

不過係呢個時間入面，大家講下大家發生既事，一邊行番屋企，雖然放工後都幾攰，但我就覺得係兩公婆既一個良好溝通時間。

忽然再想下去，如果當年唔 keep 住做呢樣野，會唔會兩公婆各自各回到家，只有各自各忙而欠缺溝通呢? 又或者我一早已經要訓梳化??